دارالاِفتاء

ایک مسجد ہے پہلے سے اس میں بیت الخلا نہیں ہے اب اس میں بیت الخلا بنانا چاہتے ہیں اور اس میں براے استنجا جانب شمال ومغرب پیشاب خانہ بنا ہوا ہے اور وہیں پر تھوڑی سی جگہ خالی ہے اسی جگہ بیت الخلا بنانا چاہتے ہیں لیکن زید کا کہنا ہے کہ جانب شمال بیت الخلا بنانا جائز نہیں ہے لہذا یہ جگہ بھی جانب شمال ومغرب ہے اس بنا پر یہاں بیت الخلا بنانا جائز نہیں ہے۔ جواب طلب امر یہ ہے کہ جانب شمال ومغرب جو جگہ خالی ہے وہاں از روے شرع بیت الخلا بنانا جائز ہے یا نہیں؟ بینوا توجروا

فتاویٰ #1391

بسم اللہ الرحمن الرحیم- الجواب ـــــــــــــــــــــــــــ: اس متعین جگہ بیت الخلا بنانے میں کوئی حرج نہیں اگرچہ وہ جانب شمال ومغرب ہے جس نے یہ کہا کہ جانب شمال بیت الخلا بنانا جائز نہیں اس نے غلط کہا شریعت پر افترا کیا یہ بہت بڑی جسارت ہے(مطلب یہ کہ زمین کا شمال مغرب میں ہونا ناجائز ہونے کی بنیاد ہرگز نہیں اس لیے اس بنیاد پر ناجائز ہونے کا حکم صادر کرنا غلط مسئلہ بتانا ہے۔ زمین کسی سمت میں ہو پیالی اس طور پر نہیں بٹھانی چاہیے کہ اس پر بیٹھنے میں منہ یا پیٹھ قبلہ کی طرف ہو۔ محمد نظام الدین رضوی عفی عنہ) حدیث میں فرمایا گیا: ’’من أفتی بغیر علم لعنتہ ملائکۃ السموات والأرض‘‘جو شخص بے علم ہوتے ہوئے فتوی دےگا اس پر آسمان وزمین کے فرشتوں کی لعنت ہے۔ واللہ تعالی اعلم(فتاوی جامعہ اشرفیہ، جلد ۵،(فتاوی شارح بخاری))