دارالاِفتاء

جب میں پیشاب کر کے فارغ ہوتا ہوں تو کچھ دیر کے بعد ایک دو قطرہ آجاتا ہے اگر میں بہت احتیاط کروں پھر بھی آجاتا ہے جس کی وجہ سے میں بہت پریشان ہوں اور یہاں مجبوری یہ ہے کہ میں شہر سے کچھ دور ہوں اور مزارع میں کام کرتا ہوں اور یہاں کچھ کشمیر اور پاکستان کے لوگ ہیں جو کبھی کبھی میرے پاس آتے ہیں تو نماز پڑھانے کے لیے ضد کرتے ہیں کیوں کہ میں آپ کے مدرسہ میں جماعت ثالثہ تک پڑھا ہوں اور داڑھی وغیرہ ماشاء اللہ سنت کے مطابق ہے لوگ مجھے پڑھا لکھا اور امامت کے لائق سمجھتے ہیں جب کہ میں معذور ہوں یہ کہنے پر بھی کبھی کبھی لوگ امامت کے لیے مجبور کردیتے ہیں اور یہی بات جب میں گھر چھٹی پر جاتا ہوں تو گاؤں والے بھی امامت کے لیے مجبور کرتے ہیں اور میرے ساتھ یہاں پر دو آدمی اور کام کرتے ہیں جو اپنے ضلع اعظم گڑھ کے ہیں لیکن وہ امامت بالکل نہیں کر سکتے کیوں کہ ان کے پاس کچھ بھی علم نہیں ہے اگر میں امامت نہ کروں تو سب لوگ الگ الگ نماز پڑھیں گے تو حضور والا سے گذارش ہے کہ کتاب وسنت کی روشنی میں بندۂ مجبور ومعذور کی رہنمائی فرمائیں ۔

فتاویٰ #1358

بسم اللہ الرحمن الرحیم- الجواب ـــــــــــــــــــــــــــ: آپ نے یہ تفصیل نہیں لکھی کہ پیشاب کے بعد قطرہ صرف ایک بار آتا ہے یا بار بار آتا ہے اگر صرف ایک بار آتا ہے تو کوئی بات ہی نہیں پیشاب کرکے اتنی دیر انتظار کرلیں کہ قطرہ آجائے پھر دھوکر کپڑا بدل کر شوق سے نماز پڑھیں، اور اگر بار بار آتا ہے تو کتنے وقفے کے بعد آتا ہے اگر اتنا وقفہ مل جاتا ہے کہ وضو کر کے فرض پڑھ سکیں تو بھی آپ معذور نہیں۔ اب بھی آپ امامت کر سکتے ہیں اور اگر اتنے کم وقفے میں آتا ہے کہ آپ وضو کر کے فرض نماز نہیں پڑھ سکتے ، جب بھی آپ وضو کرکے کھڑے ہوتے ہیں تو قطرہ آجاتا ہے۔ اسی طرح جب ایک نماز کا وقت گذر گیا اور اس پر قادر نہیں ہو سکے کہ وضو کر کے نماز فرض پڑھ سکیں تو آپ ضرور معذور ہوں گے اس کے بعد پھر یہ بھی ضروری نہیں کہ ہر نماز کے بعد یہی شدت ہو بلکہ کسی بھی نماز کے بعد ایک بار قطرے کا آجانا معذور ہونے کے لیے کافی ہے ایسی صورت میں آپ امامت نہیں کر سکتے جو لوگ معذور نہیں ان کی نماز آپ کے پیچھے درست نہیں ہوگی۔ واللہ تعالی اعلم(فتاوی جامعہ اشرفیہ، جلد ۵،(فتاوی شارح بخاری))