دارالاِفتاء

زید نے اپنی بیوی کو تین طلاقیں دیں زید اور اس کی بیوی میں ایک سال سے نااتفاقی چل رہی تھی اور اس سال کے درمیان میں زید اور اس کی بیوی ایک جگہ نہ ہوئے تھے کہ زید نے اپنی بیوی کو طلاق دے دیا تو اب یہاں کے لوگوں میں یہ جھگڑا پڑا ہوا ہے کہ زید میں اور اس کی بیوی میں ایک سال سے کوئی تعلق نہیں رہا اور زید نے طلاق دے دیا تو اس عورت کے لیے کوئی عدت نہیں ہے ۔اور کچھ لوگ یہ کہتے ہیں کہ اس عورت کو عدت میں رہنا ہوگا ۔ دوسرا مسئلہ یہ در پیش ہے ۔زید نے اپنی بیوی کو تین طلاق دیا اس حال میں کہ نہ تو زید اپنی سسرال آیا اور نہ اس کی بیوی زید کے وہاں گئی بلکہ دونوں اپنے اپنے مکان پر تھے، بلکہ جب لڑکی کا نکاح زید سے ہوا تو اس وقت لڑکی بالغ تھی اور صرف نکاح ہوا تھا اور نکاح ہوئے آج ایک سال کا زمانہ گزر رہا ہے مگر زید اور اس کی بیوی میں کوئی تعلق نہیں رہا. اب زید نے اپنی بیوی کو طلاق دے دیدی تو اس عورت کے لیے عدت ہے یا کہ نہیں ؟فقط والسلام جواب اس پتہ پر روانہ کیا جائے:رکض انصاری کو ملے ڈاکخانہ پپرائچ مقام سمتی پور مڑلا ضلع گورکھپور۔

فتاویٰ #1145

بسم اللہ الرحمٰن الرحیم- الجواب ـــــــــــــــــــــــــــ: (۱).زید اور اس کی بیوی میں جب کہ زن و شوہر کے تعلقات قائم ہوچکے مجامعت ہوچکی تو عدت ضروری ہے طلاق کے بعد تین حیض جب تک پورے نہ ہو جائیں دوسرا نکاح جائز نہیں۔ قرآن مجید میں ارشاد ہے : وَ الْمُطَلَّقٰتُ يَتَرَبَّصْنَ بِاَنْفُسِهِنَّ ثَلٰثَةَ قُرُوْٓءٍ١ؕ اور طلاق والیاں اپنی جانوں کو روکے رہیں تین حیض تک۔ واللہ تعالیٰ اعلم (۲).چوں کہ زیداور اس کی بیوی میں مجامعت نہیں ہوئی قبل مجامعت زید نے طلاق دے دی اس لیے عدت نہیں،فورا نکاح ہوسکتا ہے ۔ قرآن مجید کا فرمان ہے : يٰۤاَيُّهَا الَّذِيْنَ اٰمَنُوْۤا اِذَا نَكَحْتُمُ الْمُؤْمِنٰتِ ثُمَّ طَلَّقْتُمُوْهُنَّ مِنْ قَبْلِ اَنْ تَمَسُّوْهُنَّ فَمَا لَكُمْ عَلَيْهِنَّ مِنْ عِدَّةٍ تَعْتَدُّوْنَهَا۠١ۚ ۔ ترجمہ: اے ایمان والو جب تم مسلمان عورتوں سے نکاح کرو اور پھر انھیں بے ہاتھ لگائے چھوڑ دو تو تمہارے لیے کچھ عدت نہیں جسے گنو۔