دارالاِفتاء

موقوفہ زمین پر زید عرصہ سے قبضہ کیے ہوئے ہے۔ پنچان نے اعتراض کیا تو اعتراف کرتا ہے، باوجود اس کے مقبوضہ زمین کو چھوڑتا نہیں بلکہ اور زیادہ کی کوشش کرتا ہے اور وہ محلہ کا امام ہے ، ایسے امام کی امامت کیسی ہے ، آیا نماز اہل محلہ پڑھ سکتے ہیں یا نہیں، کوئی شرعی قباحت ہو تو بحوالۂ کتب جواب مرحمت فرمائیں۔

فتاویٰ #1031

بسم اللہ الرحمٰن الرحیم- الجواب ــــــــــــــــــــــــــــــــــــ: موقوفہ زمین پر دیدہ و دانستہ اس طرح قبضہ کرنا کہ باوجود لوگوں کے اصرار و مطالبہ کے بھی نہیں چھوڑتا بڑا گناہ ہے اور بالاعلان ہے لہٰذا فسق ہے اور زید اپنے اس فعل کی بنا پر فاسق معلن ہے اور فاسق کی امامت مکروہ تحریمی ہے ۔ ہدایہ میں ہے: ’’یکرہ تقدیم الفاسق لانہ لا یھتم لامر دینہ۔‘‘(مختصراً)) ( لہٰذا زید جب تک اپنے اس قبیح فعل سے تائب نہ ہو اس کی امامت درست نہیں۔و ھو تعالیٰ اعلم۔ (فتاوی حافظ ملت)