دارالاِفتاء

گزارش ہے کہ ہمارے یہاں ایک شخص ہے جو اپنی برادری والوں سے مالی حالت میں اچھا ہے لیکن پیسہ کے غرور میں خاندان والوں کو پریشان حال رکھتاہے یہاں تک کہ کنویں کا پانی بھی بند کر دیا ہے جو اسی کے دروازے پر ہے اور کچھ گھرفقیروں کا ہے جو بالکل غریب طبقے کے ہیں ان لوگوں کے مکان کے صحن سے ہوتے ہوئے اپنے پاخانہ کا پانی کھلے عام جاری رکھے ہے، ان لوگوں کو کافی پریشانی ہوتی ہے دروازے پر بیٹھنا دوبھر ہوجاتا ہے پھر بھی اس عمل کے ہوتے ہوئےامامت کرتا ہے اور کہتا ہے کہ جس کا جی چاہے میرے پیچھے نماز پڑھے یا نہ پڑھے مجھے پرواہ نہیں ہے۔ مسئلہ مسائل کی ہر بات پر جھگڑے پر تیار ہو جاتا ہےتو کیا ایسے شخص کا امامت کرنا درست ہے یا نہیں؟ کیا ایسے شخص کے پیچھے نماز درست ہو سکتی ہے؟

فتاویٰ #1843

----بسم اللہ الرحمن الرحیم :----- الجواب:---- اگر کنواں اس کی ملک ہے اور پانی بند کر دیا تو مجبوری ہے، اپنی ملک میں کسی کو کوئی استعمال نہ کرنے دے تو اس کو مجبور نہیں کیا جا سکتا ہے اور اگر کنواں اس کی ملک نہیں اور بند کیا تو یہ ظلم ہے اور گناہ۔ یوں ہی غریبوں کے صحن میں گندگی بہانا بھی ۔اس تقدیر پر یہ لائق امامت نہیں، اسے امامت سے معزول کر دیا جائے۔ واللہ تعالی اعلم---(فتاوی جامعہ اشرفیہ، جلد:۵(فتاوی شارح بخاری))---