دارالاِفتاء

گنگا ندی کے جنوبی کنارے پر پٹنہ شہر واقع ہے پورے شہر کا غلیظ وناپاک پانی نالوں سے بہتا ہوا گنگا ندی میں گرتا ہے یہ سارے نالے ایک دوسرے سے لگ بھگ پچیس ہاتھ سے لے کر چالیس ہاتھ کے فاصلہ میں گنگا ندی کے کنارے پر گرتے ہیں ندی کا بہاؤ مشرق کی جانب ہے اب دریافت طلب امر یہ ہے کہ نالہ گرنے کی جگہ سے کم از کم کتنے ہاتھوں کی دوری پر غسل وغیرہ کیا جائےکہ کسی قسم کی کراہت نہ ہو۔ اور نالہ گرنے کی جگہ سے بہاو کی طرف کتنے دور تک کا پانی ناپاک مانا جائے گا؟

فتاویٰ #1319

بسم اللہ الرحمن الرحیم- الجواب ـــــــــــــــــــــــــــ: اس کی حد ہاتھ یا گز سے متعین نہیں کی جا سکتی ، گنگا کے پانی میں جہاں تک نجس پانی کے رنگ، یا بو، یا مزہ کا اثر ہو اتنی دور تک کا پانی ناپاک ہے، وہاں وضو وغسل جائز نہیں بلکہ وہ پانی جس چیز پر لگے گا اسے بھی ناپاک کر دے گا اور جس پانی کے حصہ میں گندے نالے کے نجس پانی کے تینوں اثرات میں سے کوئی نہ ہو تو وہ پانی پاک ہے اس سے وضو بھی جائز ہے اور اس میں غسل بھی جائز خواہ بہاو کی طرف ہو یا اس کے مخالف سمت ہو ۔ واللہ تعالی اعلم (فتاوی جامعہ اشرفیہ، جلد ۵،(فتاوی شارح بخاری))