دارالاِفتاء

مسماۃ نعیمہ کا لڑکا الیاس جب شیر خوار تھا اس وقت ایک دوسرا لڑکا اسرائیل نے نعیمہ کا دودھ پیا تو الیاس اور اسرائیل یہ دونوں رضاعی بھائی ہوئے۔ اب الیاس کی بہن فہیمہ جو الیاس کے بعد پیدا ہوئی، اس سے اور اسرائیل سے نکاح ہو سکتا ہے یا نہیں؟مع حوالہ جواب تحریر کریں۔ بینو توجروا۔

فتاویٰ #1096

بسم اللہ الرحمن الرحیم- الجواب ــــــــــــــــــــــــــ: اسرائیل نے اگر اپنی دو سال کی عمر کے اندر نعیمہ کا دودھ پیا ہے تو اسرائیل نعیمہ کا رضاعی بیٹا ہوا اور نعیمہ کی لڑکی فہیمہ اسرائیل کی رضاعی بہن ہوئی۔ رضاعی ماں اور بہن دونوں حرام ہیں۔ قال اللہ تعالیٰ: وَاُمَّھٰتُکُمُ الّٰتِیْٓ اَرْضَعْنَکُمْ وَاَخَوٰتُکُمْ مِّنَ الرَّضَاعَةِ . اور تمہاری مائیں جنھوں نے دودھ پلایا اور دودھ کی بہنیں۔(کنز الایمان) لہٰذا فہیمہ کا نکاح اسرائیل سے ہر گز نہیں ہو سکتا۔ واللہ تعالی اعلم۔(فتاوی حافظ ملت)