دارالاِفتاء

زید ماہ شوال کے شروع ہی میں رمضان شریف کے آخری دن کو زکات کی گنتی کے لیے شمار کرتا ہے اسے یہ نہیں معلوم کہ زکات کے لیے سال کے کون سے ماہ سے کون سے ماہ تک گنتی میں لیا جائے یعنی زید رمضان شریف میں بڑا حصہ زکات کا حق داروں کو ادا کرتا ہے لیکن ایک بیوہ جس کا گزارہ لوگوں کے گھر کے برتن کپڑے وغیرہ دھونے پر چلتا ہے ۔ اس کی دو چھوٹی چھوٹی لڑکیاں ہیں وہ بھی وہی کام کرتی ہیں، ایک لڑکی کچھ پاگل ہے اور ایک پانچ چھ برس کا لڑکا ہے۔ اس کی بڑی لڑکی کی شادی ہونے والی ہے اور بہت غریب ہے لہذا اس غریب کی شادی کے وقت ان کے لیے زکات کی رقم الگ دینے کے لیے رکھی ہے۔ زکات جلد ادا کرنے کا حکم ہے لیکن ڈر ہے وہ اس کو فضول خرچ کر ڈالے گی اس لیے رکھی ہے تو کیا حکم ہے؟ نذیر جون پورا، بڑودہ ، گجرات ۱۳؍ جمادی الاولیٰ

فتاویٰ #2636

بسم اللہ الرحمٰن الرحیم - الجواب----- - افضل یہی ہے کہ سال پورا ہوتے ہی فوراً بلا تاخیر زکات ادا کردی جائے لیکن بضرورت تاخیر میں کوئی حرج نہیں۔ سوال میں جو تاخیر کی وجہ لکھی ہے وہ معقول ہے، آسانی کے لیے اس میں کوئی حرج نہیں کہ شوال کی پہلی تاریخ سے رمضان کی تیس تک زکات کے لیے متعین کر لیا جائے۔ واللہ تعالی اعلم(فتاوی جامعہ اشرفیہ، مبارک پور، جلد:۷) (فتاوی شارح بخاری)