دارالاِفتاء

ایک صاحب نصاب شخص زید ہے، جس کو گورنمنٹ کی جانب سے انکم ٹیکس دینا پڑتاہے، نہ دینے کی صورت میں وہ سزا کا مستحق قرار دیا جاتا ہے ۔ دوسری جانب شریعت مطہرہ میں زکات، وعشر فرض عین ہیں نہ دینے کی صورت میں قابل عتاب ہے۔ ان دونوں صورت میں کس کو واجب الادا سمجھا جائے گا، اور کس کو ساقط کیا جائے گا، یا پھر دونوں ادا کرنا پڑے گا؟ محمد ارشد امام، مقام وپوسٹ براھبنے، ضلع رانچی، بہار

فتاویٰ #2596

زکات ، صدقۂ فطر، عشر ادا کرنا فرض اور واجب ہے۔ انکم ٹیکس، یا حکومت کے کسی ٹیکس کی وجہ سے یہ ساقط نہیں ہو سکتا جس پر یہ چیزیں واجب ہوں انھیں بہر حال ادا کرنا واجب ہے، نہیں ادا کرے گا گناہ گار ہوگا۔ واجب اس کے ذمہ رہ جائے گا۔ رہ گیا انکم ٹیکس اس کو وہ جانے اور حکومت جانے[اس کا حاصل یہ ہے کہ انکم ٹیکس کی وجہ سے زکات معاف نہ ہوگی۔ ہاں! انکم ٹیکس کا مطالبہ حکومت کی طرف سے ہوتا ہے، جس سے بچنا دشوار ہے تو اسے بدرجہ دین شمار کر کے زکات والے مال کے مجموعہ سے کم کردیں گے جو باقی بچے گا اس پر زکات فرض ہوگی، مثلاً کسی کے پاس مجموعی مال زکات ایک لاکھ بیس ہزار روپے ہے مگر اس پر بیس ہزار روپے انکم ٹیکس کے بھی عائد ہوتے ہیں تو ٹیکس کی یہ مقدار مجموعی مال سے کم کر کے صرف ایک لاکھ روپے کی زکات ’’ڈھائی ہزار روپے‘‘ فرض ہوگی۔ عشر پوری پیداوار پر واجب ہوتا ہے اس لیے انکم ٹیکس کی وجہ سے اس پر کوئی اثر نہیں پڑے گا، رہ گیا صدقۂ فطر کا نصاب تو اس کا حال مال زکات کی طرح ہے۔ ۱۲ محمد نظام الدین رضوی]۔ واللہ تعالی اعلم۔(فتاوی جامعہ اشرفیہ، جلد:۷(فتاوی شارح بخاری)