تازہ ترین معلومات

حضور حافظ ملت کو صرف اشرفیہ کی نہیں پوری امت مسلمہ کی فکر تھی

"حضور حافظ ملت کو صرف اشرفیہ کی نہیں پوری امت مسلمہ کی فکر تھی" (مولانا مسعود احمد برکاتی)

مبارک پور اعظم گڑھ:-
"ایک ماہر استاذ، ایک کامل مرشد اور ایک دیانت دار منتظم و سربراہ میں جتنی خوبیاں ہونی چاہئیں وہ سب حضور حافظ ملت علیہ الرحمہ کی ذات میں جمع تھیں، ان کا وجود امت مسلمہ کے لیے غنیمت تھا، وہ حقیقت میں حافظ ملت تھے، بے نفسی اور استغنا ان کا خاص وصف تھا، انھیں صرف اپنے شاگردوں اور اشرفیہ کے اساتذہ و انتظامیہ کا خیال نہ تھا بلکہ عوام الناس سے بھی ان کی زندگی جڑی ہوئی تھی اور وہ سب کی خوشی اور غم میں شرکت فرماتے تھے، انھوں نے اشرفیہ قائم فرماکر امت مسلمہ پر بڑا احسان کیا اور تعلیم دین کے ساتھ فروغ اسلام کی ایک تحریک کی بنیاد رکھی، انھوں نے صرف اشرفیہ کی فکر نہیں کی بلکہ پوری امت مسلمہ کا خیال کیا اور اپنے وصال کے بعد اپنا سچا جانشین اور اشرفیہ کو آگے بڑھانے والا سربراہ حضرت عزیز ملت کی شکل میں چھوڑا جنھوں نے اپنے والد گرامی کے منصوبوں کو بھی پورا کیا اور نئے شعبوں کا اضافہ بھی کیا، اشرفیہ کے فارغین پوری دنیا میں خدمت دین میں مصروف ہیں اور اشرفیہ کا نام روشن کر رہے ہیں۔" ان خیالات کا اظہار خطیب اسلام علامہ مسعود احمد برکاتی استاذ جامعہ اشرفیہ نے اکیاونویں عرس عزیزی کی پہلی روحانی تقریب میں کیا، 22 نومبر بعد نماز فجر قیام گاہ حافظ ملت پر اجتماعی قرآن خوانی ہوئی جس میں قصبہ مبارک پور کے عوام و خواص، اساتذۂ اشرفیہ و حفاظ نے شرکت کی، تقریباً آٹھ بجے حضرت قاری محمد اشہر عزیزی کی تلاوت سے بزم عرس کا آغاز ہوا، اس کے بعد قاری اشہر عزیزی اور حافظ عبد الوکیل چھپراوی نے نعت و منقبت کے اشعار پیش کیے پھر علامہ مسعود احمد برکاتی کا معلومات افزا اور دل پذیر خطاب ہوا، صلاۃ و سلام، قل شریف، شجرہ خوانی اور حضرت عزیز ملت علامہ عبد الحفیظ عزیزی سربراہ اعلیٰ جامعہ اشرفیہ کی دعا پر مجلس کا اختتام ہوا، شہزادہ عزیز ملت مولانا محمد نعیم الدین عزیزی اور ان کے برادران و دیگر اہلیان قصبہ انتظام و نگرانی میں مصروف رہے، اس پاکیزہ مجلس میں خصوصی طور میں علامہ نصیرالدین عزیزی، سون بھدر، مولانا غلام حسین مصباحی، حافظ جمیل احمد عزیزی مبارک پور، مولانا محمد صدر الوریٰ قادری، مولانا نفیس احمد مصباحی، مفتی نسیم احمد مصباحی، مفتی زاہد علی سلامی، مولانا جنید احمد مصباحی، مولانا توفیق احسن برکاتی، مولانا غلام نبی مصباحی، مولانا محمد مشرف مصباحی، مولانا جمال ہاشم مصباحی، حافظ انوار احمد مصباحی، مولانا قاری محمد شرف الدین مصباحی ممبئی، مولانا محمد عمر نظامی ممبئی وغیرہ بہت سے علما و مبلغین و زائرین موجود رہے، آج شب میں اشرفیہ کیمپس میں اجلاس عام منعقد ہوگا اور 23 نومبر کی شب میں جلسہ دستار بندی اور محفل قل منعقد ہوگی جس میں اشرفیہ کے مختلف شعبوں کے فارغین کو دستار و سند دی جائے گی۔