ماہنامہ اشرفیہ

فکر و نظر

*ستمبر 2025 کا عنوان—                  مدارس کی تعلیم اور جدید تقاضے: چند اصلاحی تجاویز

*اکتوبر 2025 کا عنوان—       اخلاقِ نبوی ﷺ اور آج کی مسلم قیادت

اخلاقی محاسن و کمالات کے جامع 

از: مفتی محمد ساجدرضا مصباحی

سید الشہداء حضرت امام حسین رضی اللہ عنہ نہ صرف رسول کریم صلی اللہ علیہ وسلم کے جگر گوشہ ، خاتون جنت سیدہ  فاطمۃ الزہرا رضی اللہ تعالیٰ عنہا کے نور نظر ،مولاے کائنات حضرت علی کرم اللہ وجہہ الکریم کےجگر پارےاور خاندان نبوت  کے چشم وچراغ تھے،  بلکہ آپ تاریخِ اسلام کی ایک عظیم شخصیت، امت مسلمہ کے لیے  مشعل راہ ، ملت اسلامیہ کے محافظ وپاسبان ، کشتی امت کے ناخدا، حق وصداقت کے علم بردار، صبر و رضا کے  پیکراورقیامت تک کے متلاشیان حق کے لیے مینارۂ نور و ہدایت بھی تھے،اس میں کوئی شک نہیں  کہ آپ کی حیات مبارکہ کا ہر گوشہ درخشاں ، ہر پہلو  نمایاں اور ہر زاویہ تابندہ ہے۔ آپ  علم وعمل ، فضل وکمال ،جود وسخا ، زہد وورع اور حلم وبردباری کے ساتھ تمام تر اخلاقی محاسن وکمالات کے جامع تھے۔

حضرت امام عالی مقام رضی اللہ عنہ کے ساتھ ارض کربلا  میں پیش آنے والا الم ناک واقعہ  اوروہاں کے قیامت خیز حالات  میں آپ کی جرأت واستقامت،اسلامی نظام کے احیا کی خاطراپنی اور اپنے اہل خانہ کی عظیم قربانی پیش کر کے ظالم و جابر حکمراں  کے سامنے  اعلاے کلمۃ الحق کی جو عظیم مثال آپ نے پیش کی اس کی نظیر انسانی تاریخ میں نظر نہیں آتی۔  

سیدنا امام حسین رضی اللہ تعالیٰ عنہ  کی ولادت4ھ میں ہوئی ، انھوں نے کائنات کی سب سے عظیم شخصیت  کے آغوش شفقت میں  تربیت پائی ،وہ  مصطفیٰ جان رحمت صلی اللہ علیہ وسلم کےسب سے چہیتے نواسے تھے ، آقاے کائناتﷺ آپ سے  بڑی محبت فر ماتے تھے ، بلکہ  ان کی محبت کو اپنی محبت قرار دیتے تھے، اس مضمون کی متعدد احادیث کتب حدیث میں موجود ہیں ، والد کریم شیر خدا مولاعلی کرم اللہ وجہہ الکریم اور والدہ مشفقہ سیدہ فاطمۃ الزہر ا  کے زیر سایہ زندگی کا ایک اہم حصہ گزارا،نسبی اور خاندانی فضائل وکمالات اس پر مستزاد تھے، ایسے میں محاسن وکمالات  کا ایک سمندر آپ کے اندر موج زن ہو نا لازمی تھا ، عام  طور پر مورخین ، تذکرہ نگاران  اورواعظین واقعۂ کر بلا کی روشنی میں آپ کی بے مثال قربانی  اور صبر ورضا کے حوالے سے آپ کی عظمتوں کو بیان کرنے پر اکتفا کرتے ہیں، جب کہ آپ  کی حیات مبارکہ کاہر گوشہ  بے شمارفضائل وکمالات سے  پُرہے ۔ابن اثیر لکھتے ہیں:

وکان الحسین رضی اللہ عنہ فاضلا کثیرا لصوم والصلاة والحج والصدقۃ و افعال الخیر جمیعا۔ (ابن الاثیر، اسدالغابہ،ج۲:ص: ۲۳)

 یعنی حضرت امام حسین رضی اللہ عنہ بڑی فضیلت کے مالک، کثرت سے روزہ، نماز، حج ادا کرنے والے، صدقہ دینے والے اور تمام افعال خیر انجام دینے والے تھے۔

حضرت امام عالی مقام اور کثرت عبادات:

حضرت امام عالی مقام کی حیات مبارکہ کا ایک اہم پہلو یہ بھی  ہے کہ آپ زہد وورع کے اعلیٰ مقام پر فائز تھے ، عبادت گزاری اور خشیتِ الٰہی میں بھی  امتیازی  مرتبے کے حامل تھے۔

امام ذہبی نے ’’سیر اعلام النبلاء‘‘میں لکھا :

کان من سادات الزہادو أئمۃ العباد۔ (سیر أعلام النبلاء، ج:3، ص:289)

یعنی آپ زاہدوں کے سردار اور عبادت گزاروں کے امام  تھے۔

حضرت امام حسین رضی اللہ تعالیٰ  عنہ کو شب بیداری اور تہجد سے خاص انسیت تھی۔ امام ابن عساکرنے اپنی کتاب ’’تاریخ دمشق‘‘میں لکھا:

ما ترك صلاته اللیل حتی یوم استشهاده۔  (تاریخ دمشق، ابن عساکر، ج: 14، ص:217)

یعنی آپ نے اپنی زندگی میں کبھی تہجد کی نماز ترک نہ کی، حتیٰ کہ شہادت کے دن بھی نہیں۔

مشہور مؤرخ ابن کثیرنے ’’البدایہ والنہایہ‘‘میں امام حسین رضی اللہ عنہ  کی کربلا میں عبادت کا تذکرہ کرتے ہوئے لکھا:

طلب الحسین من القوم تأخیر القتال لیلة لیصلّی و یدعو ربّه۔(البدایہ والنہایہ، ابن کثیر، ج:8، ص:185)

یعنی حضرت امام حسین رضی اللہ عنہ نے دشمن سے کہا کہ جنگ کو ایک رات مؤخر کر دو تاکہ میں نماز پڑھوں، دعا کروں اور اپنے رب سے مناجات کر سکوں۔

امام جلال الدین سیوطی رحمۃ اللہ علیہ ، جو جلیل القدر محدث و مفسر ہیں، اپنی کتاب ’’تاریخ الخلفاء‘‘میں امام حسین رضی اللہ عنہ کے بارے میں لکھتے ہیں:

کان عابدًا، فاضلًا، کثیر الصوم والصلاة۔ (تاریخ الخلفاء، ص: 207)

یعنی حضرت امام حسین عبادت گزار، فضیلت والے، اور کثرت سے روزے رکھنے اور نماز پڑھنے والے تھے۔

عفوو درگزر:

 حضرت امام عالی مقام رضی اللہ  تعالیٰ عنہ  اپنے اخلاق وکردار اور عفوودر گزر جیسے اوصاف میں  اپنے نانا جان مصطفیٰ جان رحمت صلی اللہ علیہ وسلم کے عکس جمیل تھے ، آپ نے اپنے جانی دشمنوں کو بھی معاف فر ماکر ان کے لیے ہدایت کی دعا فر مائی ۔

علامہ شمس الدین ذہبی(متوفی ۷۴۸ھ) نے’’سیر أعلام النبلاء‘‘ میں لکھا:

کان من سادات المسلمین، فقیهًا، سیدًا، کثیر الصلاة والصوم والصدقة، عالِمًا، عابدًا، شجاعًا، جوادًا۔ (سیر أعلام النبلاء، ج: 3، ص: 289)

یعنی حضرت امام حسین رضی اللہ تعالیٰ عنہ مسلمانوں کے سردار، بڑے فقیہ، عبادت گزار، سخی، شجاع، اور معاف کرنے  والےتھے۔

ابن کثیرنے’’البدایہ والنہایہ‘‘ میں حضرت  امام حسین رضی اللہ تعالیٰ عنہ اور حر بن یزید ریاحی کے واقعے کو بیان کرتے ہو ئے لکھا :فخرج إلیه الحر بن یزید، فوقف بین یدی الحسین وقال: هل لی من توبة؟ فقال الحسین: نعم، یتوب الله علیک، انزل۔(البدایہ والنہایہ، ابن کثیر، ج:8، ص:185)

یعنی جب حر بن یزید نے توبہ کی تو حضرت  امام حسین رضی اللہ تعالیٰ عنہ نے فرمایا: ہاں، اللہ تیری توبہ قبول فرمائے ، ہمارے ساتھ  آجاؤ۔

ابن کثیرہی کی  روایت ہے کہ جب حر بن یزید اپنے لشکر کے ساتھ امام حسین رضی اللہ عنہ کے قافلے کے قریب پہنچا، تو حضرت امام حسین رضی اللہ نے ان سے کوئی شکوہ نہ کیا بلکہ ان کے سپاہیوں کو پانی پلایا:

فسقاه الحسین وأصحابه الماء، و حتی الخیول۔ (البدایہ والنہایہ، ج: 8، ص: 164)

حضرت امام حسین رضی اللہ عنہ اور ان کے ساتھیوں نے ان  کو پانی پلایا، حتیٰ کہ ان کے گھوڑوں کو بھی۔

ابن سعد اپنی مشہور کتاب ’’الطبقات الکبریٰ‘‘میں حضرت  امام حسین رضی اللہ عنہ کی دعا نقل کرتے ہیں، جب آپ نے میدانِ کربلا میں دشمنوں کی ہدایت کے لیے دعا کی:

اللهم اهدِ قومي فإنهم لا يعلمون۔(الطبقات الكبرى، ابن سعد، ج :5، ص: 429)

اے اللہ! میری قوم کو ہدایت دے، کیوں کہ وہ نہیں جانتے۔

میدانِ کربلا میں جب آپ شدید زخمی ہو چکے تھے اور آخری لمحات میں تھے، تب بھی آپ نے کسی کو بددعا نہ دی، بلکہ قرآن کی تلاوت، ذکر، اور دعا میں مشغول رہے۔ابن عساکر اپنی کتاب تاریخ دمشق میں نقل کرتے ہیں:

فكان في آخر لحظاته يذكر الله ويقول: رضاك يا رب فوق كل رضا۔(تاریخ دمشق، ابن عساکر، ج :14، ص:223)

حضرت امام حسین رضی اللہ عنہ  اپنی حیات کے آخری لمحات میں  اللہ کو یاد کرتے رہے اور کہتے رہے: اے رب! تیری رضا ہر رضا سے بلند ہے۔

حاجت مندوں کی مدد:

امام عالی مقام سید نا امام حسین رضی اللہ تعالیٰ عنہ کو سخاوت اورفیاضی ورثے میں ملی تھی اس لیے کمال فیاضی اور ایثار کا مظاہرہ کرتے ہوئے خلقِ خدا کی حاجات کو پورا کرنا آپ کا معمول تھا۔

حافظ ابن عساکر نے ابو ہشام القناد البصری کی زبانی یہ چشم دید  نقل کی ہے کہ میں حضرت حسین بن علی بن ابی طالب رضی اللہ عنہما کے پاس بصرہ سے سامان فروخت کے لیے لایا کرتا تھا۔ آپ باصرارمجھ سے قیمت کم کراتے ،پھر میرے وہاں سے اٹھنے سے پہلے پہلے اس سامان کا زیادہ تر حصہ لوگوں کو عنایت فرمادیا کرتے۔ میں نے عرض کیا: اے شہ زادۂ رسول! میں آپ کے پاس بصرہ سے سامان لاتا ہوں، آپ باقاعدہ اصرار کرکے اس میں قیمت کم کراتے ہیں اور پھر میرے اٹھنے سے پہلے پہلے اس کا زیادہ تر حصہ لوگوں میں تقسیم بھی کردیتے ہیں اس کی کیا وجہ ہے؟ آپ نے فرمایا: میرے والد گرامی نے مجھے یہ مرفوع حدیث سنائی تھی کہ حضور صلی اللہ علیہ وآلہ وسلم نے فرمایا:

المخبون لا محمود ولا ماجور. (ابن منظور، مختصر تاریخ دمشق لابن عساکر، ج:7، ص: 115)

یعنی جو آدمی سودے یا لین دین میں دھوکا کھا جائے وہ قابلِ ستائش ہے نہ قابل اجر۔

ایک مرتبہ ایک سائل مدینہ منورہ کی گلیوں میں گھومتے ہوئے آپ کے دروازے پر پہنچا۔ دستک دی اور اپنی حاجت کا درج ذیل اشعار کی صورت میں یوں اظہار کیا:

لم یخب الیوم من رجاک ومن    حرک من خلف بابک الحلقه

وانت جود وانت معدنة           ابوک ما کان قاتل الفسقه

آج آدمی نامراد واپس نہیں جائے گا جو آپ کے پاس امید لے کر آیا ہے اور جس نے آپ کے دروازے کا حلقہ کھٹکھٹایا ہے آپ سراپا بخشش اور جود و کرم کی کان ہیں۔ آپ کے والد وہ عظیم شخص تھےجنھوں نے فاسقوں سے جنگ فرمائی تھی۔

حضرت سیدنا امام حسین رضی اللہ عنہ اس وقت نماز میں مصروف تھے دروازے کی دستک اور سائل کی حاجت انھوں نے نماز میں سن لی۔ نماز میں تخفیف کی اور باہر تشریف لائے۔ دیکھا کہ سائل کے چہرہ پر واقعی فقر و فاقہ کے آثار ہیں، آپ نے واپس آکر اپنے غلام کو بلایا اور فرمایا کہ ہمارے نفقہ میں سے تمہارے پاس کچھ ہے؟ اس نے کہا کہ دو سو درہم ہیں۔ جن کے متعلق آپ کی ہدایت ہے کہ انھیں  آپ کے اہل خانہ پر خرچ کردوں۔ آپ نے فرمایا: وہ سب درہم لاؤ کیوں کہ ان سے زیادہ حق دار آدمی آگیا ہے۔ پھر ان دراہم کو پکڑکر باہر نکلے اور انھیں  اس اعرابی (سائل) کو دیتے ہوئے فی البدیہہ یہ اشعار کہے:

خذھا فانی الیک معتذر           واعلم بانی علیک ذوشفقۃ

لو کان فی سیرنا عصاۃ لما               کانت سماء علیک مند فقہ

لکن ریب المنون ذونکد          والکف منا قلیلۃ النفقۃ

(تاریخ دمشق لابن عساکر)

امام عالی مقام اور واقعۂ  کر بلا:

حضرت امام عالی مقام رضی اللہ تعالیٰ عنہ کی حیات پاک کا سب سے اہم باب  واقعۂ  کر بلا ہے یہ تاریخِ اسلام کا وہ درخشندہ باب ہے جس کی روشنی قیامت تک انسانیت کو راہ دکھاتی رہے گی۔ یہ صرف ایک جنگ، ایک سانحہ یا چند افراد کی شہادت کا نام نہیں، بلکہ یہ ایک  دینی ،روحانی، فکری اور اخلاقی انقلاب ہے۔

واقعۂ کربلا کی سب سے نمایاں معنویت یہ ہے کہ یہ حق و باطل کے درمیان ایک واضح لکیر کھینچ دیتا ہے۔ جب اسلامی خلافت کے نام پر یزید جیسا فاسق، ظالم جابر، اور بے عمل حکمران اقتدار پر قابض ہوا اور دین کے نام پر ظلم، بے عدلی اور فسق پھیلانے لگا توحضرت  امام حسین رضی اللہ تعالیٰ عنہ نے دین وشریعت کے مقابلے میں کسی  کی بھی پروا نہیں کی ،اور حق کا راستہ اختیار کیا اور دنیاوی مال ومنال  اور عیش وآرام کو ٹھوکر مارکر راہِ حق میں پہنچنے والی مصیبتوں کاخوش دلی سے استقبال کیا اور ہزار آفتوں اور بلاؤں کے باوجود یزید جیسے فاسقِ  وفاجر کی بیعت کا خیال بھی اپنے قلبِ مبارک میں نہ آنے دیا ۔

 کربلا میں حضرت امام حسین رضی اللہ عنہ  کے عظیم کردار سے انسانیت کو یہ سبق ملا کہ ظلم کے سامنے جھک جانا بزدلی ہے، اور حق پر ڈٹ جانا ہی اصل کامیابی ہے، چاہے اس کی قیمت جان کی قربانی ہی کیوں نہ ہو۔ کر بلا کا حسینی کردار قیامت تک مظلوموں کو حوصلہ، اور ظالموں کو للکار دیتی رہے گی۔

در اصل جب یزید پلید  تخت نشیں ہوا تو اس نے اسلام کے سیاسی و دینی نظام کو ملوکیت میں بدلنے کی کوشش کی، شریعت کے حدودو کو پامال کر نے میں کوئی دریغ نہیں کیا ، اس نے اسلامی نظام کو  اپنی خواہشات پرقربان کر نا شروع کیا،وہ فاسق، فاجر، شراب نوش اور حدودِ شریعت سے مکمل طورپرمنحرف تھا، اور اسلامی خلافت کو اپنی نفسانی خواہشات  کی تکمیل کا آلہ بنا رہا تھا۔ ایسے وقت میں اگر خاندان بنوت کا یہ چشم وچراغ   اعلاے کلمۃ الحق  کا فریضہ نہ اداکرتا تو اسلام کی اصل روح مسخ ہو جاتی، اور باطل کو ہمیشہ کے لیے قوت و تائید فراہم ہو جاتی۔

 ایسے عالم میں حضرت امام حسین رضی اللہ تعالیٰ عنہ نے  نہ صرف یزید کی بیعت سے انکار فر مایا  بلکہ پوری جرأت و استقامت کے ساتھ  اعلان کیا:

’’ مثلی لا یبایع مثله‘‘میرے جیسا، اس جیسے کی بیعت نہیں کر سکتا۔(البدایہ والنہایۃ  )

حضرت امام عالی مقام نے کرب وبلا  کی سر زمین  میں خالص دین کی سر بلندی کے لیے   جس کرب واضطراب کا سامنا کیا  اور جس طرح ہزاروں یزیدی فوج کے مقابلے میں  اپنے چند رفقا کے ساتھ  جواں مردی کا مظاہرہ کرتے ہو ئے حق کی آواز بلند کی ، اس كو کبھی فراموش نہیں کیا جا سکے گا ،ظلم وجبر کے مقابلے  میں آپ کی سیرت کا یہ درخشاں پہلو  تمام اسلامیان عالم کو روشنی فراہم کرتا رہے گا۔

حسینی  سیرت کا یہ پہلو بھی  بڑا تابندہ ہے کہ آپ نےمصائب وآلام پر کبھی بھی شکوہ نہیں کیا ، بلکہ ہمیشہ صبروورضا کے پیکر  بنے رہے ،دسویں محرم الحرام  کوآپ پیاس کی شدت سے نڈھال تھے ، خیموں میں تڑپتے شہ زادے تھے، اہل و عیال کے لرزتے دل تھے، دشمن کے تیروں کی بارش تھی، لیکن ان کے لبوں پر شکایت کے بجاے رب کی حمد وثنا تھی ۔ اپنے پیارے بیٹے علی اکبر کو رخصت کرتے وقت آنکھوں سے اشک ضرور بہے، مگر دل اللہ کی رضا میں مستغرق رہا۔

کربلا کے اس سفر میں حضرت  امام حسین رضی اللہ عنہ نے اپنے بھائی، بھتیجے، بیٹے، ساتھی، سب کچھ قربان کر دیا، مگر دینِ اسلام کے اصولوں پر ذرّہ برابر سمجھوتا نہیں كیا۔ بلاشبہہ کربلا میں امام حسین رضی اللہ عنہ   نے وہ عظیم کردار پیش کیا جس کی روشنی میں اہلِ حق ہمیشہ اپنی راہیں متعین کرتے رہیں گے۔ صبرِ حسین قیامت تک انسانیت کو عزت، حوصلہ، اور حق پر ثابت قدمی کا پیغام دیتا رہے گا۔◘◘◘

راہِ ہدایت کے درخشندہ ستارے

از: مفتی محمد اعظم مصباحی مبارک پوری