ماہنامہ اشرفیہ

جون 2024 کا عنوان—سیرتِ امام حسین  رضی اللہ عنہ

*جولائی 2024 کا عنوان—حضرت مجدد الف ثانی کے معمولت اور تعلیمات

کیا عورت محرم کے بغیر سفر اور حج کر سکتی ہے؟

 از:مفتی عبدا لقیوم ہزاروی

حضرت ابو سعید خدری رضی اللہ عنہ سے مروی حدیث مبارکہ میں ہے کہ حضور نبی اکرم صلی اللہ علیہ وآلہ وسلم نے فرمایا:

”عورت کے لیے جائز نہیں کہ وہ تین دن سے زیادہ مسافت کا سفر تنہا طے کرے۔“(طبرانی، المعجم الاوسط، 6 : 267، رقم : 6376)

پرانے وقتوں میں سفر بہت کٹھن اور پُر خطر ہوتے تھے، زیادہ تر سفر پیدل یا گھوڑوں اور اونٹوں پر کیا جاتا تھا، ایک شہر سے دوسرے شہر جانے میں کئی کئی ہفتے صرف ہو جاتے تھے۔ اِس لیے حضور نبی اکرم صلی اللہ علیہ وآلہ وسلم نے عورت کو تنہا تین دن سے زیادہ کا سفر کرنے سے منع فرما دیا تاکہ اُس کی عفت و عصمت کی حفاظت ہو، بلکہ ایک روایت میں تو ’دو دن‘ کے الفاظ بھی ہیں۔ اِنہی سفری تکالیف اور خطرات کے باعث آپ صلی اللہ علیہ وآلہ وسلم نے خواتین کو تنہا حج کرنے سے بھی منع فرمایا ہے۔ حضرت ابو اُمامہ باہلی رضی اللہ عنہ سے مروی ہے کہ حضور نبی اکرم صلی اللہ علیہ وآلہ وسلم نے فرمایا:

’’مسلمان عورت کے لیے جائز نہیں کہ وہ اپنے خاوند یا کسی محرم کے بغیر حج کرے۔‘‘(ابن خزيمة، الصحيح، 4 :134، رقم : 2522/طبرانی، المعجم الکبير، 8 :261، رقم : 8016)

اِنہی اَحادیث اور اَحکامِ شریعت کی روشنی میں وضع کیے گئے، سعودی عرب کے مروّجہ قوانین کے مطابق کسی عورت کو مَحرم کے بغیر حج یا عمرہ کا ویزا ہی جاری نہیں کیا جاتا۔ لہٰذا موجودہ دور میں عورت کا مَحرم کے بغیر حج یا عمرہ کرنا ممکن ہی نہیں ہے۔

البتہ ہمیں اُس عِلّت اور پس منظر کا بھی جائزہ لینا چاہیے جس کی بنا پر عورت کو مَحرم کے بغیر تین دن سے زیادہ مسافت کا سفر اور حج کرنے سے منع فرمایا گیا۔ در حقیقت منع کا یہ حکم اِس لیے دیا گیا تھا کہ قدیم زمانے میں سفر بہت کٹھن اور پُرخطرات ہوتے تھے۔ سفر پیدل یا جانوروں پر کیا جاتا تھا اور کئی کئی ہفتے اور مہینے سفر میں صرف ہوتے تھے۔ نیز دورانِ سفر چوروں، ڈاکووں اور لٹیروں کا بھی بہت زیادہ خطرہ ہوتا تھا۔ اندریں حالات عورت کی عصمت و حفاظت اور سفری تکالیف و خطرات کے پیشِ نظر اسے اکیلے سفر کرنے سے منع فرما دیا گیا۔محرم درحقیقت حفاظت کے لیے ہوتے تھے۔ آج ذرائعِ مواصلات بہت ترقی کرگئے ہیں۔ بے شمار سفری سہولیات و آسانیاں میسر آ چکی ہیں۔ دورانِ سفر سکیورٹی وغیرہ کے مسائل بھی نہیں رہے اور حج کی ادائیگی کا باقاعدہ نظام ترقی پا چکا ہے۔ حکومتی سطح پر گروپ تشکیل دیے جاتے ہیں جو مَحرم کی طرح ہی خواتین کو تحفظ فراہم کرتے ہیں اور خواتین کو اُس طرح کے مسائل و خطرات کا سامنا نہیں کرنا پڑتا جو پرانے وقتوں میں درپیش ہوتے تھے۔ گویا ریاست کی طرف سے ملنے والی سکیورٹی اور سیفٹی مَحرم بن گئے ہیں، کیوں کہ حکمِ مَحرم کی حکمت یہی تھی۔ لہٰذا اِن سفری سہولیات کے ساتھ جب عورت عورتوں کے گروپ میں یا ایک ایسے گروپ میں جہاں مرد و خواتیں اکٹھے ہوں لیکن فیملیز ہوں اور خواتین کی کثرت ہو تو یہ اِجتماعیت مَحرم کا کردار ادا کرتی ہے۔ انِ حالات میں عورت کے لیے مَحرم کے بغیر سفر کرنا ناجائز نہیں رہتا۔ چاہے وہ (تین دن سے زیادہ مسافت کا) عام سفر ہو یا سفرِ حج اور عمرہ۔واللہ و رسولہ اعلم بالصواب۔***

آج کے زمانے میں خواتین کا سفر حج -شرعی و عقلی نقطۂ نظر سے

از:مولانا محمد ناصر حسین مصباحی

پہلے خواتین کو محرَم کے ساتھ ہی حج یا عمرہ پر جانے کی اجازت دی جاتی تھی اور  پورے حج کے دوران انھیں ساتھ رہنا ہوتا تھا مگر سنہ 2022ء سے سعودی عرب نے اعلان کیا کہ اب دنیا بھر کی خواتین حج یا عمرہ کے لیے محرم یا شوہر کے بغیر بھی سعودی کا سفر کر سکتی ہیں۔ سعودی عرب کا یہ اقدام جہاں عربوں کی برسوں سے چلی آرہی تہذیب و روایت کے خلاف ہے وہیں شرعی حکم کے بھی منافی ہے۔ سعودی عرب مغرب کی تقلید میں اتنا آگے جا چکا ہے کہ اب اسے اپنی دینی شبیہ کی بھی کوئی پروا نہیں رہی۔

ہندوستان میں سنہ  2018 میں حکومت ہند کی حج کمیٹی نے ’’محرم کے بغیر خواتین كے سفر حج کا زمرہ‘‘ بنایا اور   پینتالیس (45) سال یا اس سے زیادہ عمر کی خواتین کو بغیر محرم کے حج کے لیے درخواست دینے کی اجازت دے دی جس میں اہل خواتین کے لیے چار (4) کے گروپوں میں زمرہ’’محرم كے بغیر سفر‘‘ کے تحت حج کرنے کا انتظام کیا اور  سنہ 2023 میں حکومت کے کہنے پر چار خواتین کی گروپ بندی کی ذمہ داری بھی ختم کر دی  اور اب انفرادی  اہل خواتین کو بھی محرم كے بغیر سفر حج کے لیے درخواست دینے کی اجازت دے دی گئی۔  چوں کہ حج کمیٹی آف انڈیا کے ذریعے بنائی گئی یہ نئی حج پالیسی خواتین کے تحفظ اور انتظامی امور کے موافق نہ ہونے کے ساتھ ساتھ صریح حکم شرعی کے بھی برخلاف ہے اس لیے پورے ملک میں اس کی مذمت کی گئی اور کی جا رہی ہے۔

شرعی نقطۂ نظر :  حدیث شریف میں ہے:  ابو سعید خدری رضی اللہ تعالیٰ عنہ سے روایت ہے کہ  رسول اللہ صلی اللہ علیہ وسلم نے فرمایا : جو عورت اللہ عزوجل اور قيامت کے دن پر ايمان رکھتی ہے اس کے لیے حلال نہیں کہ وہ اپنے باپ، بھائی، شوہر، بيٹے يا کسی محرم کے بغيرتین دن يا اس سے زيادہ کا سفر کرے۔ (صحیح مسلم، کتاب الحج، باب سفر المرأۃ مع المحرم إلی الحج وغیرہ، رقم الحدیث:۹۳۳۱)

ابو ہریرہ رضی اللہ تعالیٰ عنہ سے روایت ہے کہ حلال نہیں اس عورت کو کہ ایمان رکھتی ہو اللہ اور قیامت پر کہ ایک منزل کا بھی سفرکرے مگر محرم کے ساتھ جوا س کی حفاظت کرے۔ ( صحیح بخاری  باب فی کم یقصر الصلوٰۃ وسمہ النبی صلی اﷲ تعالیٰ علیہ وسلم یوماً ولیلۃ 1/147-48 ۔صحیح مسلم        باب سفر المرأۃ مع محرم الی حج وغیرہ               1/433-34۔  سنن ابوداؤد    کتاب المناسک باب المرأۃ تحج بغیر محرم            1/241)

’’محرم‘‘  عورت کا وہ رشتہ دار ہے جس سے نکاح کرنا نسب یا رضاعت یا سسرالی رشتے کی وجہ سے ہمیشہ کے لیے حرام ہے۔

ان احادیث میں صراحت ہے کہ عورت بغیر محرم کے سفر نہیں  کرسکتی، ان میں  کسی سفر کی تخصیص نہیں  ہے؛ مگر چوں کہ حضور صلی اللہ علیہ وسلم کے زمانے میں  عورتیں  شاذ و نادر ہی تجارت ، دعوت، یا جہاد کا سفر کرتی تھیں ، ان کے زیادہ تر سفر ، حج و عمرہ کے لیے ہی ہوتے تھے اس لیے یہ نہیں ہو سکتا کہ حضور صلی اللہ علیہ وسلم اس جانب توجہ نہ فرمائی ہو اور ہدایت نہ دی ہو ،   لہٰذا ان احادیث میں  حج کا سفر بھی شامل ہے ۔ صحابۂ کرام  نے بھی ان احادیث سے یہی سمجھا کہ حج کا سفر بھی اس ممانعت میں  داخل ہے، یہی وجہ ہے کہ ایک صحابی نے پوچھا یارسول اللہ صلی اللہ علیہ وسلم میں  جہاد کے لیے تیار ہوں  اور میری بیوی حج کو جارہی ہے؟  تو حضور صلی اللہ علیہ وسلم نے ان سے فرمایا تم بھی بیوی کے ساتھ حج کو جاؤ اور جہاد کا ارادہ ابھی ترک کر دو۔  (دیکھیے: صحیح بخاری، کتاب جزاء الصید، باب حج النساء، حدیث نمبر:1862،اور صحیح مسلم، کتاب الحج، باب سفر المرأۃ مع المحرم إلی الحج وغیرہ، حدیث نمبر:1341)

اس مسئلے میں بعض صریح حدیث بھی ہیں جن میں زوج یا محرم کے بغیر عورت کو براہ راست حج کرنے سے حضور صلی اللہ علیہ وسلم نے منع فرمایا:

عن ابن عباس رضی اللہ تعالی عنہ أنہ قال... قال النبي ﷺ: لا تحجن امرأۃ إلا ومعہا ذومحرم.

ابن عباس رضی اللہ تعالیٰ عنہما سے روایت ہے کہ نبی صلی اللہ علیہ وسلم نے فرمایا:ہرگز کوئی عورت محرم کے بغیر حج نہ کرے۔

 (سنن دار قطنی، کتاب الحج، حدیث نمبر:2440)

حضور صلی اللہ علیہ وسلم کے زمانہ میں  اکثر خواتین قابل اطمینان تھیں ؛بلکہ سب کہا جائے تو بھی غلط نہیں  ہوگا اور مردبھی سب متقی و پرہیزگار تھے کیوں کہ وہ صحابۂ رسول صلی اللہ علیہ وسلم تھے ۔اس کے باوجود حضور صلی اللہ علیہ وسلم نے عورتوں کو بغیر محرم یا بغیر زوج کے سفر کی اجازت نہیں دی، اس سے معلوم ہوتا ہے کہ کوئی عورت دوسری قابلِ اطمینان خواتین یا متقی اور پرہیزگار مردوں کے ساتھ بھی سفر نہیں  کرسکتی۔  نیز عمر کی زیادتی اور خواتین کا تعدد بھی کافی نہیں  بلکہ محرم کا ہونا ہی ضروری ہے۔

مذکورہ احادیث کے پیش نظر فقہاے حنفیہ نے فرمایا کہ  عورت کو بغیر محرم کے تین دن یا زیادہ کی راہ جانا، ناجائز ہے بلکہ ایک دن کی راہ جانا بھی۔ نابالغ بچہ یا مَعتُوہ کے ساتھ بھی سفر نہیں کرسکتی، ہمراہی میں بالغ محرم یا شوہر کا ہونا ضروری ہے۔ (فتاوی عالمگیری وغیرہ) عورت کو بغیر محرم یا بغیر شوہر کے حج کے لیے جانا حرام ہے اگر حج کرے گی تو ہوجائے گا مگر ہر قدم پرگناہ لکھا جائے گا۔  

(فتاوی رضویہ، جلد چہارم، ص 691)

محرم کے ليے ضروری ہے کہ سخت فاسق بے باک و غیر مامون نہ ہو۔  لہذا  اگر عورت مکہ معظمہ سے تاحدِ سفر دور ہو اس پر بغیر محرم حج فرض نہ ہوگا،یہی مذہب احناف ہے۔

 (بہار شریعت حصہ 4 ، نماز مسافر کابیان، صفحہ 101)

مسلک حنفی: حنفی مسلک میں عورت خواہ جوان ہو یا بوڑھی اس کے لیے حج پر جانے کے لیے محرم کا ساتھ ہونا شرط ہے ، اگر کوئی بوڑھی عورت اپنے پڑوسی یا کسی اور غیر محرم کے ساتھ حج کو جانا چاہتی ہے تو نہیں جاسکتی ہے ۔اگر آخر عمر تک محرم نہ ملے تو وصیت کرجائے کہ میری طرف سے حج بدل کرادیا جائے ۔رد المحتار میں ہے: یجب الإیصاء إن منع المرض أو خوف الطریق أو لم یوجد زوج ولا محرم۔ (شامی:2/200)اگر یہ شبہہ ہو کہ وصیت نافذ نہ کی گئی تو حج میرے ذمے باقی رہ جائے گا تو اس شبہے کا جواب یہ ہے کہ اگر ایسا ہو بھی جائے تو وہ گناہ گار نہیں ہوگی، کیوں کہ اس نے اپنے ذمے کے واجب (وصیت کرنے) کو ادا کردیا۔

مسلک شافعی: امام نووی شافعی فرماتے ہیں: امام شافعی اور ان کے اصحاب کا قول یہ ہے کہ جب تک عورت اپنی عزت کے بارے میں مطمئن اور بے خوف نہ ہو اس وقت تک اس پر حج فرض نہیں ہے۔ اور یہ اطمینان خواہ شوہر سے حاصل ہو خواہ نسبی محرم سے خواہ سسرالی محرم سے خواہ چند مستند عورتوں سے۔ ان تین (زوج ، محرم، یا چند مستند عورتوں کی رفاقت) میں سے کوئی بھی میسر نہ ہو تو صحیح مذہب یہ ہے کہ عورت پر حج فرض نہیں ہوگا، خواہ صرف ایک عورت کی رفاقت میسر ہو یا نہ ہو ۔ (شرح مہذب ج 7، ص: 86، دارالفکر بیروت)

علامہ نووی علیہ الرحمہ نے فرمایا ہے کہ نفلی حج، زیارت، تجارت یا کسی اور مقصد کے لیے آیا عورت کسی ایک مستند اور معتمد عورت یا متعدد معتمد عورتوں کے ساتھ سفر کر سکتی ہے یا نہیں؟ اس میں سب سے معتمد قول یہ ہے کہ یہ سفر جائز نہیں ہے اور تمام فقہا کا اتفاق ہے کہ یہی حکم صحیح ہے۔  کتاب الام میں بھی یہی مذکور ہے ، اس سفر کے حرام ہونے کی دلیل وہ احادیث ہیں جن میں بغیر زوج یا محرم کے سفر سے ممانعت آئی ہے۔(فتح العزیز شرح الوجیز مع شرح المہذب ج 7، ص 23 و 24 دار الفکر بیروت)

مسلک حنبلی: علامہ ابن قدامہ حنبلی اس مسئلے پر بحث کرتے ہوئے لکھتے ہیں کہ جس عورت کا کوئی محرم نہیں ہے اس پر حج واجب نہیں ہے۔ امام احمد نے اس کی تصریح کی ہے ۔ ابو داود کہتے ہیں میں نے امام احمد سے کہا ایک عورت امیر ہے اور اس کا کوئی محرم نہیں ہے اس پر حج فرض ہے؟ کہا نہیں۔ (المغنی ج 3، ص 97، دار الفکر بیروت) 

اگر چہ شافعیہ اور مالکیہ نے کچھ حدود و قیود اور شرطوں کے ساتھ گنجائش دی ہے کہ قابل اطمینان خواتین گروپ کے ساتھ فرض حج کا سفر کر سکتی ہے مگر عوام کے لیے یہ جائز نہیں ہے کہ جب جس کا قول چاہے اختیار کر لے۔ نیز ان ائمہ نے جو حدود و قیود اور شرائط رکھی ہیں عورتیں اولاً ان سے واقف نہیں ہوتیں اور اگر واقف بھی ہو جائیں تو ان کا کوئی لحاظ نہیں کرتیں  اور ہر حال میں چلی جاتی ہیں جس کی وجہ سے خود ان ائمہ کے نزدیک بھی ان کا محرم کے بغیر سفر جائز نہیں ہوتا۔

رہا عورت کا تنہا انفرادی طور سے سفر حج    کرنا تو یہ کسی بھی مسلک میں جائز نہیں۔ آج کل ہوائی سفر کی سہولت کی وجہ سے ایسی صورت حال پیش آتی ہے کہ مثلاً ایک شخص اپنی ماں کو بمبئی ہوائی جہاز پر چڑھائے اور جدہ میں ان خاتون کا دوسرا بیٹا استقبال کو موجود رہے۔ اس طرح ہوائی جہاز پر صرف چند گھنٹے ایسے گزرتے ہیں جن میں کوئی محرم ساتھ نہیں ہوتا ۔ آیا یہ صورت جائز ہوگی؟اس سلسلہ میں اصولی طور پر یہ بات ذہن میں رکھنی چاہیے کہ فقہا کے نزدیک سفر شرعی کے لیے تین دنوں کی مدت مطلوب نہیں ہے بلکہ اتنی مسافت مطلوب ہے جس کو انسان پیاده رفتار میں تین دنوں میں طے کر سکے۔ اس طرح ظاہر ہے کہ ہوائی جہاز کا یہ سفر گو کہ چند گھنٹوں کا ہے مگر وہ بھی سفر شرعی ہے، یہی وجہ ہے کہ اس مختصر وقت میں بھی نمازوں میں قصر کرنے کا حکم ہے اور رمضان المبارک میں روزہ افطار کرنے کی رخصت ہوتی ہے۔

شر عی اور فقہی نقطۂ نظر سے ہٹ کر عقلی و عملی طورپر بھی سفرِ حج میں خواتین کے ساتھ شوہر یامحرم کاہونا نہایت ضروری ہے۔

عقلی نقطۂ نظر :   ایئر پورٹ اور جہاز میں ہر طرح کے لوگ ہوتے ہیں جن میں آوارہ ، شریر اور بد معاش بھی ہوتے ہیں، آج کے شر و فساد  اور برائی کے زمانے میں شیطان انسانوں  کو ورغلاتا ہے ان کے دل میں  وسوسے ڈالتاہے، انھیں  گناہ پر آمادہ کرنے کی کوشش کرتا ہے، خواتین کی طرف نظریں  اٹھانے کی دعوت دیتاہے ، بدنگاہی تو عام ہو چکی ہے، ایئرپورٹ یا جہاز میں بھی بعض بد بخت رش کا فائدہ اٹھاکر خواتین سے بد تمیزی اور چھیڑ خوانی کر سکتے ہیں اور اپنے بے ہودہ جملوں کا نشانہ بنا سکتے ہیں، بلکہ  آوارہ نوجوانوں یہ  جرأت بھی کر بیٹھتے ہیں کہ جب وہ عورت کو اکیلی دیکھتے  ہیں جس کے ساتھ محرم مرد نہیں ہوتا تو وہ اسے تنگ کرنے کی کوشش کرتے ہیں۔

اس زمانے میں بےحیائی اس قدر بڑھ چکی ہے کہ عورتوں کا پورا گروپ ہوتے ہوئے بھی شریر ، آوارہ اور بدمعاش لوگ شرارت سے نہیں چوکتے۔ ، ایسے حالات میں جب شریعت اس کو حاضر ہونے کا حکم نہیں دیتی ہے  بلکہ روکتی ہے تو بلا وجہ یہ خطرہ مول کر گنہ گار ہونے کی کیا ضرورت ہے۔ حج کا اصل مقصد اللہ تعالیٰ کی رضا اور خوشنودی حاصل کرناہے اور جب شریعت میں ایک بات سے منع کردیا گیا ہوتو اس کے ارتکاب کی وجہ سے بجائے ثواب کے گناہ ہی ہوگا۔  ہندوستان میں رہنے والے اکثر مسلمان حنفی مسلک کے پیروکار ہیں اور ان کے نزدیک بغیر محرم کے عورت اگر جائے تو حج تو اس کا ہوجائے گا؛ مگراس سفر کا گناہ سر پر رہے گا۔

عورت پر بغیر شوہر یا بغیر محرم کے سفر حج کو لازم کرنا اس کی عزت و عفت کو غیر محفوظ چھوڑنا  اور اسے مشقت میں ڈالنا ہے، جو بہت خطرناک ہے۔ یہ ایسا ہی جیسے مساوات اور آزادی کے نام پر یہ کہا جائے کہ اب ہمارے ملک کے وزیر اعظم بغیر سیکوریٹی اور محافظ دستہ کے کہیں بھی جانا چاہیں  تو جائیں ، ظاہر ہے یہ وزیر اعظم کے ایک حق کو ان سے چھیننا ہے، اسی طرح سفر میں  محرم کی شرط کو ہٹانا عورت کو اس کے ایک حفاظتی حق سے محروم کرنا ہے۔ ، لہٰذا اسلام میں خواتین کے لیے یہ حکم کہ وہ بغیر محرم کے سفر نہ کرے ،عورت کے ساتھ شفقت، اس کے لیے سہولت و راحت اور اس کی جان و مال، عزت و آبرو کی حفاظت کو یقینی بنانے کے لیے ہے۔

عملی نقطۂ نظر: سفر حج میں  قدم قدم پر ایسے مراحل سامنے آتے ہیں ، جن میں  عورت کو محرم مرد کے سہارے کی ضرورت ہوتی ہے جس کے بغیر ان کی تمام ضرورتیں  تنہا عورتوں  سے پوری نہیں  ہوسکتیں کیوں  کہ عام طور پر عورت فطری اعتبار سے کمزور اور نازک واقع ہوئی ہے۔  حج کے سفر کے دوران، حج کی ادائیگی کے دوران، وہاں  کی آب وہوا کی تبدیلی کی وجہ سے درپیش  بیماریوں  اور دیگر پریشانیوں  میں  عورت بڑے سہارے اور مدد کی محتاج ہوتی ہے ۔  مقام کی اجنبیت ، قدم قدم پر لوگوں کا ہجوم ، زبان سے ناواقفیت وغیرہ اسباب کی بنا پر مختلف مسائل اور دشوایاں درپیش ہوتی ہیں، بعض اوقات بہت سی قانونی کارروائیوں سے بھی گزرناپڑتاہے، ان مواقع پر محر م رشتے داریاشوہر کی سخت ضرورت پڑتی ہے۔   بعض اوقات سفر کے دوران گاڑی وغیر ہ میں  بیماری میں  اتارنے چڑھانے کی ضرورت پڑتی ہے اور یہ کام محرم یا شوہر کے علاوہ دوسرا کوئی نہیں کرسکتا۔

اس لیے شریعت کا یہ حکم کہ کوئی عورت بغیر محرم کے سفر حج یا دوسرا سفر نہ کرے بڑی حکمت و دانائی پر مشتمل ہے، اس میں ان کی ضرورت، سہولت ، راحت اور تمام تر حفاظت کا بھرپور لحاظ کیا گیا ہے۔  اس لیے دینی دنیوی دونوں اعتبار سے بھلائی اسی میں ہے کہ  عورتیں اسلامی احکام کے مطابق سفر حج کریں ۔ حقیقت یہ ہے کہ عورتوں کو اللہ تعالیٰ نے مردوں کے مقابلے میں فطری طور پر کمزور اور نازک بنایا ہے چاہے وہ ترقی اور آزادی نسواں کے نام پر گھروں سے نکلنے کے پروگرام بناتی رہیں اگر وہ اسلامی حدود و قیود کو اپنی زندگی کی زینت نہیں بنا ئیں گی تو وہ غیر محفوظ ہوتی چلی جائیں گی۔***

چراغ خانہ

دور جدید کے مسائل نسواں

تسنیم فرزانہ ، بنگلور